బాలల రచయిత, స్టోరీ టెల్లర్‌ ఉమామహేశ్వరరావు.  పిల్లల్లో బాధ్యతారాహిత్యం, ఆత్మన్యూనత, ఆత్మహత్యలు వంటి ధోరణులు బాలసాహిత్యం చదవకపోవడం వల్లనేనని, పిల్లల్లో చదివే అలవాటు పెంచే బాధ్యత తల్లిదండ్రులదేనని అంటారాయన . ఆయన జానపద నవల ‘ఆనందలోకం’ కేంద్ర సాహిత్య అకాడమీ బాలసాహిత్య పురస్కారానికి ఎంపికైన సందర్భంగా ఉమామహేశ్వరరావు ఇంటర్వ్యూ

విజయనగరం జిల్లా సీతానగరం మండలంలోని మారుమూల పల్లెటూరు గెడ్డలుప్పి మా గ్రామం. 1964నవంబరు 14వ తేదీన బాలల దినోత్సవంనాడు పుట్టి, బాలసాహిత్య రచయితగా ఎదగడం నా అదృష్టం. మా నాన్నగారు నారంశెట్టి గంగయ్య. అమ్మ సావిత్రమ్మ. ఐదుగురు సంతానంలో నేను మూడోవాడిని. ప్రతిరోజు నాటుపడవలెక్కి సువర్ణముఖి నది దాటివెళ్ళి సీతానగరం స్కూల్లో టెన్త్ వరకు చదువుకున్నాను. నదిలో ఈతలు కొడుతూ, ఆటలాడుతూ శారీరక దారుఢ్యం పెంచుకుంటూ మనోవికాసం పొందాను. బొబ్బిలి ఆర్‌ఎస్‌ఆర్‌కె కళాశాలలో ప్రథమశ్రేణిలో పాసై, ఆంధ్రాయూనివర్సిటీలో ఎం.ఏ సోషియాలజీ, పబ్లిక్‌ అడ్మినిస్ట్రేషన్‌ చదివి, 1986లో పోస్టల్‌ డిపార్ట్‌మెంట్‌లో చేరాను. ప్రస్తుతం విశాఖపట్నంలో ఇన్‌స్పెక్టర్‌ ఆఫ్‌ పోస్టాఫీసెస్‌గా పనిచేస్తున్నాను. 

స్టోరీ టెల్లింగ్‌, తొలి కథ, నవల

ఏడో తరగతిలోనే గేయాలు, పద్యాలు, కవితలు రాసేవాణ్ణి. నా మొదటి కథ ‘కష్టే ఫలే’. టెన్త్‌లో నేను రాసిన నా మొదటి నవల ‘మేలెరిగిన మనిషి’. 1981లో బాలజ్యోతి అనుబంధ నవలగా వెలువడింది. అలా 75రూపాయలు తొలి పారితోషికం అందుకున్నాను. బాలల రచయితగా స్థిరపడటానికి అదే నాకు పునాది. ఆ తర్వాత చందమామ, బాలమిత్ర, బొమ్మరిల్లు, బుజ్జాయి, బాలభారతి, బాలచంద్రిక, జాబిల్లి, బాల, బాలకిరీటం, బాలరంజని, చిరుమువ్వలు, బాలభారతం, మొలక, శ్రీవాణి పలుకు, బాలబాట, నాని సహా పలు దినపత్రికల అనుబంధాల్లో నా రచనలు విరివిగా ప్రచురితమయ్యాయి.

ఇదీ నా బాల సాహిత్యం

లాలిపాప్‌ అనే యాప్‌ (గూగుల్‌ ప్లేస్టోర్‌లో డౌన్‌లోడ్‌ చేసుకోవాలి) కోసం అనేక కథలు, దేశనాయకుల చరిత్రలు, విజ్ఞాన విశేషాలు, సాంఘిక కథలు, చూడదగ్గ ప్రదేశాలు, జానపద కథలు, జీవిత చరిత్రలు రాశాను. ఇవన్నీ పిల్లలు హాయిగా ఆండ్రాయిడ్‌ ఫోన్‌లో చూసుకోవచ్చు. ఐదు రోజుల వ్యవధిలో రాసిన ‘e–తరం కుర్రాడు’ ఆధునిక, వైజ్ఞాన, హాస్య నవలకు తానా నలభైవసంతాల (2017) పోటీల్లో బహుమతి లభించింది. వింత జలం, రైతు సింహాసనం, e-–తరం కుర్రోడు, ఊహలకే రెక్కలు వస్తే, ఆనందలోకం, వింత పెళ్ళి, వెండినాణెంలో వింతరాక్షసుడు, ముసుగువీరుడు...మొత్తం ఎనిమిది బాలల నవలలు రాశాను. 18కథలు, ‘మేలెరిగిన మనిషి’ నవల రెంటినీ కలిపి అదే టైటిల్‌తో నా మొదటి కథాసంకలనం విడుదల చేశాను. దీనికి 2012లో బాల సాహిత్య పరిషత్‌ పోటీల్లో ప్రథమ బహుమతి లభించింది. 

తెలుగు రక్షణ వేదిక జాతీయ ప్రధానకార్యదర్శిగా అనేకచోట్ల కవులను పిలిచి కవి సమ్మేళనాలు నిర్వహిస్తూ, వారి కవితలను సంకలనాలుగా తెస్తున్నాం. అలా మూడు సంకలనాలు తెచ్చాం. 2017 అక్టోబరు 14, 15, 16లలో అనంతపురంలో 33 గంటల44నిమిషాల 55 సెకన్లు నిర్వహించిన ‘ప్రపంచ రికార్డు కవిసమ్మేళనం’లో ఐదు వరల్డ్‌ రికార్డులు (భారత్‌ బుక్‌ ఆఫ్‌ రికార్డ్స్‌, ఆంధ్రా బుక్‌ ఆఫ్‌ రికార్డ్స్‌, తానా బుక్‌ ఆఫ్‌ రికార్డ్స్‌, ఎన్టీఆర్‌ బుక్‌ ఆఫ్‌ రికార్డ్స్‌, నేషనల్‌ బుక్‌ ఆఫ్‌ రికార్డ్స్‌) నమోదయ్యాయి. 28 గంటలు సభానిర్వహణ చేసి వ్యక్తిగత రికార్డు కూడా సృష్టించాను.   

పుస్తకం చదవడంమీద గ్రిప్‌ వస్తే, స్కూలు పుస్తకాల్ని కూడా సులభంగా చదువగలుగుతారు. పెద్దలతో ఎలా మాట్లాడాలో, సమస్య వస్తే ఎలా పరిష్కరించుకోవాలో, యుక్తిగా, చమత్కారంగా, అనర్గళంగా ఎలా మాట్లాడాలో తెలుస్తుంది. క్లాసు పుస్తకాలు మాత్రమే చదివేవారికంటే, బాలసాహిత్యం చదివేవారిలో నాలెడ్జి, జ్ఞాపకశక్తి రెండింతలుంటుందని ఇప్పటికే అనేకసార్లు రుజువైంది.

పిల్లలకోసం నారంశెట్టి బాలసాహిత్యపీఠం ప్రారంభించాను. వారిని బాలసాహితీవేత్తలుగా తీర్చిదిద్దడం, వారి రచనలు ముద్రించడంతోపాటు బాలరచయితలకు నగదుపురస్కారాలిచ్చి ప్రోత్సహిస్తున్నాం. గత ఏడాది మూడు రాష్ర్టాల నుంచి ముగ్గురికి బాలసాహితీ జాతీయ పురస్కారాలిచ్చాం. ప్రతినెలా స్కూళ్ళకు వెళ్ళి బాలసాహిత్యం చదువుకునేలా విద్యార్థుల్ని మోటివేట్‌ చేస్తున్నాం. కథారచనలో మెళకువలు నేర్పుతున్నాం. 

పిల్లల ఆత్మహత్యలు నివారించేది  బాలసాహిత్యం

ఇప్పటి పిల్లల్లో భయం, భక్తీ లేవు. పెద్దలపట్ల, గురువులపట్ల గౌరవమర్యాదలు పోతున్నాయి. టెక్నాలజీ నాలెడ్జ్‌ పెరిగేకొద్దీ, బాలసాహిత్యానికీ, మానవసంబంధాలకూ వారు దూరమవుతున్నారు. దీనివల్ల కొందరు పిల్లలు టెక్నాలజీని దుర్వినియోగం చేస్తుంటే, మరికొందరు పిల్లలు మార్కులు, మందలింపుల పేరిట ఆత్మహత్యలకు పాల్పడుతున్నారు. పిల్లలతో బాలసాహిత్యం చదివించడమే ఈ సమస్యలన్నింటికీ సులభ పరిష్కారం. దానివల్ల వారికి నిర్ణయ సామర్థ్యంతోపాటు కష్టపడి ఉన్నత స్థానానికి వెళ్ళాలనే దృక్పథం అలవడుతుంది.

కుటుంబం

పురస్కారాలు