Telugu Jokes in Andhrajyothi

అజమాయిషీ

కన్నబాబుకి విమానాశ్రయంలో బిల్‌గేట్స్‌ కనిపించాడు. వెంటనే అతని దగ్గరకు వెళ్లి... ‘‘సార్‌! నాకోసం ఓ క్లయింట్‌ వస్తున్నాడు. ఆ సమయంలో మీరు నా దగ్గరకు వచ్చి ‘బాగున్నావా కన్నా!’ అని అడిగితే నా పరపతి పెరిగిపోతుంది’’ అని ప్రాధేయపడ్డాడు. అతను కోరినట్లుగానే క్లయింట్‌తో మాట్లాడుతుండగా బిల్‌గేట్స్‌ వచ్చి ‘బాగున్నావా కన్నా!’ అని అడిగాడు. వెంటనే కన్నబాబు ‘బుద్ధి లేదూ. క్లయింట్‌తో మాట్లాడుతుంటే విసిగిస్తావా. ఫో అవతలికి’ అనేశాడు!!!
 

 

అంతా టైమ్‌

సుబ్బారావు కారు తోలీ తోలీ అలసిపోయాడు. కాసేపు రోడ్డు పక్కనే నిలిపి ఓ కునుకు తీసే ప్రయత్నంలో పడ్డాడు. అలా తలవాల్చాడో లేదో. ‘హలో. టైమ్‌ ఎంతయ్యింది?’ అని లేపాడు దారిన పోయే దానయ్య. లేచి విసుక్కుంటూ ‘నాలుగున్నర’ అని చెప్పి మళ్లీ నిద్రలోకి జారుకున్నాడు. మరో పది నిమిషాలకు... ‘మాస్టారూ! టైమ్‌ ఎంతయ్యింది?’ అని అడిగాడు రోడ్డున పోయే రామయ్య. ‘నాలుగూ ముప్పావు’ అని విసుక్కున్నాడు సుబ్బారావు. ఇలాగే ఉంటే లాభం లేదనుకుని ఓ కాగితం మీద ‘నాకు టైమ్‌ తెలియదు’ అని రాసి అద్దానికి తగిలించి నిద్రపోయాడు. పది నిమిషాలు గడిచాయో లేదో ఎవరో నిద్ర లేపారు. ‘టైమ్‌ తెలియదన్నావుగా. నాకు తెలుసు. ఐదు గంటలు’ అని చెప్పి చక్కా పోయాడు, పక్క నుంచి పోయే పాపయ్య.
 

 

ఓ మిడిల్‌క్లాస్‌ కథ

మా ఇంట్లో ఎలుక పడింది. దాన్ని ఎలా వదిలించుకోవాలో చెప్పవా!
- ఏముంది ఓ బోను ఉంచు.
అబ్బే బోను కొనేందుకు నా దగ్గర డబ్బెక్కడుంది?
- సరే! ఎలుకల మందు పెట్టు.
అహా... అది చాలా ఖరీదు కదా!
- పోనీ పకోడీ పెట్టి, ఎలుక తింటుంటే కొట్టి చంపెయ్యి.
నేను తిండి తినే రెండు రోజులయ్యింది.
- కనీసం ఓ ఉల్లిపాయ ముక్కన్నా వాడు.
అమ్మో ఉల్లిపాయలా... బోల్డు రేటు కదా!
- ఇంక ఆ ఎలుక ఖర్మ... నీ దరిద్రం చూశాక విరక్తి పుట్టి రెండ్రోజుల్లో అదే పారిపోతుంది.
 

 

స్నేహం కోసం...

‘నువ్వు నా ప్రాణస్నేహితుడివి కాబట్టి నా బీరువా తాళాలు నీ దగ్గర ఉంచి వెళ్తున్నాను’ అంటూ రోహిత్‌ చేతిలో తాళం చెవులు ఉంచి ఊరికి బయల్దేరాడు కార్తీక్‌. పది నిమిషాల్లో అతనికి రోహిత్‌ నుంచి ఫోన్‌వచ్చింది. ‘పచ్చి మోసం. నువ్వు ఇచ్చిన తాళం చెవులతో బీరువా తెరుచుకోవడం లేదు’ అంటూ.

 

అలవాటు

డాక్టర్‌: కోమాలోకి వెళ్లిన పేషెంట్‌కి స్పృహ వచ్చిందా?
నర్స్‌: రాకేం. మధ్యమధ్యలో వాట్సప్‌, ఫేస్‌బుక్‌ మెసేజీలు చూసుకుని, మళ్లీ కోమాలోకి జారుకుంటున్నాడు.
 

 

దారి

అభిరాం ఊరికి వెళ్తూవెళ్తూ దారి తప్పిపోయాడు. దిక్కులు చూస్తూ ఉండగా, దారిన పోయే దానయ్య కనిపించాడు. ‘నక్కలపాలేనికి ఎటు వెళ్లాలో చెబుతారా!’ అని అడిగాడు.
‘నేరుగా ఓ నలభై వేల కిలోమీటర్లు వెళ్తే నక్కలపాలెం వస్తుంది’ తాపీగా చెప్పాడు దానయ్య.
‘అంతదూరం ఉంటుందా! దానికంటే, వెనక్కి తిరిగి వెళ్లిపోవడం నయం’ అంటూ నిట్టూర్చాడు అభిరాం.
‘వెనక్కి తిరిగి వెళ్లేట్లయితే ఓ మూడు కిలోమీటర్లలోనే నక్కలపాలెం వస్తుంది’ అంటూ జారుకున్నాడు దానయ్య.
 

 

ఆఫర్‌

ఏదో కేసులో వీరబాబును ఉరితీస్తున్నారు. తనని చూసి జైలువార్డెనుకి జాలేసింది. ‘చూడూ! రేపు ఉదయమే నిన్ను ఉరితీసేస్తారు. ఈలోగా నాతో కలిసి ఓ రెండు పెగ్గులు మందుకొట్టు’ అని ఆఫర్‌ చేశాడు.
‘అబ్బే వద్దులేండి... నేను మందు కొడితే వారం రోజులు హ్యాంగోవర్‌ తగ్గదు’ అంటూ ఆఫర్‌ను తిరస్కరించాడువీరబాబు.
 

 

మ్యాన్‌ హాండ్లింగ్‌

తన ఇంట్లోకి చొరబడే ప్రయత్నంలో ఉన్న దొంగని చూసి రంగాయమ్మ చితక్కొట్టేసింది. ఆపై బుద్ధిగా పోలీసులను పిలిచింది. ‘వెరీ గుడ్‌ రంగాయమ్మగారు! మీ ధైర్యాన్ని మెచ్చుకుంటున్నాను. కానీ ఆ దొంగని మరీ అంతలా కొట్టకుండా ఉండాల్సింది’ అంటూ పొగడ్తలతో పాటు నసిగాడు ఇన్‌స్పెక్టరు.
‘అబ్బే నిజంగా అలా కొట్టాలనుకోలేదండీ! గేటు దూకి ఇంట్లోకి వస్తున్న మనిషి మా ఆయనే అనుకున్నాను. అందుకే చితకామతకా దంచేశాను’ అంటూ సంజాయిషీ చెప్పుకుంది రంగాయమ్మ.

 

Page: 1 of 116
Copyright and Trade Mark Notice © owned by or licensed to Aamodha Publications PVT Ltd.
Designed & Developed by AndhraJyothy.