ఒంగోలు, 09-03-2018: తన రచనలకు గుర్తింపు లేదని ఒక కవి ఉరేసుకొని ఆత్మహత్యకు పాల్పడిన సంఘటన నగరంలోని కృష్ణా థియేటర్‌ ఎదురుగా గదిలో జరిగింది. మద్దిపాడు మండలం ఇనమనమెళ్లూరు గ్రామానికి చెందిన షేక్‌ రఫీ(45) ఉరివేసుకొని మృతి చెందారు. రఫీ ‘మహర్షి’ అనే కలం పేరుతో కవితలు రాస్తుండేవారు. ఆయనకు ఇంకా వివాహం కాలేదు. తను రాసిన రాతలకు గుర్తింపులేదని మనస్థాపం చెంది స్నేహితుని రూములో ఆత్మహత్య చేసుకున్నారు. రఫీ కవిత్వం రాసుకుంటూ తన స్నేహితుడు కరిముల్లా ఖాన్‌ రూము తాళం బుధవారం తీసుకున్నాడు.గురువారం సాయంత్రం ఆయ్యే వరకు ఆ గది తలుపులు తీయలేదు. దీంతో ఆనుమానించి గదిలోకి కిటికీ ద్వారా తొంగి చూడగా ఇనపరాడ్డుకు ఉరేసుకొని వేలాడుతూ కనిపించాడు. టూటౌన్‌ పోలీసులకు కరిముల్లా ఖాన్‌ సమాచారం ఇవ్వడంతో ఇన్‌స్పెక్టర్‌ సురేష్ కుమార్‌ రెడ్డి తన సిబ్బందితో వచ్చి తలుపులు పగులగొట్టి మృతదేహాన్ని కిందకు దించారు. అక్కడ రఫీ ఒక చీటిరాసి పెట్టాడు. తన మృతదేహాన్ని మీడియా వచ్చేవరకు ఎవరు కదిలించవద్దని తాను మృతి చెందింది ప్రపంచానికి తెలిసే విధంగా ఉండాలని రాసిపెట్టాడు టూటౌన్‌ పోలీసులు కేసు నమోదు చేసి మృతదేహన్ని రిమ్స్‌కు తరలించారు.