క్షేత్రయ్య పదాలను అత్యంత నిదానంగా పాడాలంటూ భీష్మించుకుంటే ఏమయ్యింది.? ఆ పదాలను ఎవరూ వినలేని పరిస్థితి ఏర్పడింది. క్షేత్రయ్య పదాలు జనాలకు దూరం కావడానికి వాటిలో శృంగారమే ఉందన్న అపోహ ఒక కారణమైతే, విలంబనా విధానం నుంచి ఏమాత్రం వైదొలగకపోవడం మరో కారణమైంది. అందుకే క్షేత్రయ్య విషయంలో నేను రెండు లక్ష్యాలు ఏర్పరచుకున్నాను. వాటిలో ఈ మహాకవి పదాల్లో ఉన్నది శృంగార భావనే కాదని చెప్పడం ఒక లక్ష్యం అయితే.. వాటిని అన్నమయ్య పదాల్లాగే ఐదారు నిమిషాల నిడివిలో పాడే కొత్త పంథాను జనంలోకి తీసుకు వెళ్లాలన్నది మరో లక్ష్యం. ఈ నా ప్రయత్నాన్ని కొంత మంది పండితులు విమర్శించినా, ఎంతో మంది ప్రజలు ఈ విధానానికి ఆనందిస్తున్నారు. అభినందిస్తున్నారు. విమర్శించే ఆ పండితులైనా క్షేత్రయ్య పదాలను పాడే విధానం ఇది కాదు కదా అంటారే గానీ, తాము పాడి వినిపించరు. నిజానికి ముందు విమర్శించిన పండితుల్లో కూడా కొందరు ఆ తర్వాత ఆమోదిస్తున్నారు. క్షేత్రయ్య పదాలు సంగీతపరంగా, సాహిత్యపరంగా, నాట్య పరంగా ఎంతో ఉపయుక్తమైనవి. క్షేత్రయ్యపదాలను నెమ్మదిగా పాడే రోజుల్లో ఆ పదాలకు చేసే నాట్యం కూడా అదే రీతిలోనే ఉండేది. అందుకే చాలా మంది జనం వాటికి దూరమైపోయారు. అన్నమయ్య, త్యాగరాజు కీర్తనలు పొందిన ప్రఖ్యాతి క్షేత్రయ్య పదాలకూ లభించేలా నా వంతు కృషి చేస్తాను. పాడటంలో వేగాన్ని పెంచితే, నాట్యంలో కూడా వేగం పెరుగుతుంది. ఇది జరగాలి. అందుకే ఈ కొత్త రీతులను నా వద్ద సంగీతం నేర్చుకుంటున్న వారికి చెబుతున్నాను. కొత్త తరం వారు క్షేత్రయ్య పదాలను వినూత్నంగా పాడుతూ వాటిని విశ్వవ్యాప్తం చేస్తారని బలంగా నమ్ముతున్నాను. 

‘‘రాజ్యలక్ష్మి కొన్నేళ్లుగా క్షేత్రయ్య పదాలను స్వరపరిచి గానం చేస్తున్నారు. ఆలిండియా రేడియోలో గత 40 ఏళ్లుగా గానం చేస్తుండటం వల్ల సంగీత ప్రియులకు ఆమె గొంతు చిరపరిచితం. ప్రస్తుతం ఆమెకు 79 ఏళ్లు. అయినా ఆమె స్వరం చెక్కు చెదరలేదు. క్షేత్రయ్య పదాలకు కొత్త వన్నెలు దిద్దుతోంది. క్షేత్రయ్య రాసిన 330 పదాలు, ఆయన జీవిత వృత్తాంతాన్ని తెలియజేసే ఒక పుస్తకం, సీడీలను విడుదల చేశారు’’