చెప్పుకోదగ్గ ప్రయోగం అంటే ఒకే కృతిని నేను హయ్యర్‌ ఆక్టేవ్‌లో పాడితే.. అమ్మ లోయర్‌ ఆక్టేవ్‌లో పాడేవారు. వినడానికి చాలా అద్భుతంగా ఉండేది. అమ్మతో పాడిన ‘జననీ నిన్ను వినా.. రావే హిమగిరి.. తెర తీయగ రాదా’ కృతులు విన్నప్పుడు ఆ ప్రయోగం కనిపిస్తుంది. 

• ఎం.ఎస్.సుబ్బులక్ష్మికి వంట చెయ్యడం రాదు. కానీ ఇంటికి ఎవరొచ్చినా వారికి స్వయంగా అతిథి మర్యాదలు చేసేవారు. బ్రెడ్‌ పీస్‌ మసాలా చాలా ఇష్టంగా తినేవారు. ఎక్కువ చింతపండు వేసి చేసిన వెత్తకొళంబు ఆమెకు చాలా ఇష్టం. 
• ప్రతి కచేరీకి ముందు ఇడ్లీ పొడితో ఇడ్లీ తిని, అరకప్పు కాఫీ తాగి అర్ధగంట పూర్తిగా విశ్రాంతి తీసుకునేవారు. ఆ రోజు పాడాల్సిన కీర్తనల గురించి కుమార్తె రాధతో కాసేపు చర్చించేవారు. 
• ఎం.ఎస్‌ ఇంట్లో ‘సుక్కు కాఫీ’ ప్రత్యేకంగా ఉండేది. ఎవరొచ్చినా ఇష్టంగా అడిగి తాగేవారు. శొంఠి, ధనియాలు, బెల్లం వేసి ఈ కాఫీ తయారు చేసేవారు. 
• ప్రతి రోజూ ఉదయాన్నే నాలుగు గంటలకు లేచి కుమార్తెతో కలిసి 108 సార్లు ‘అ’కార సాధన చేసేవారు. తానే స్వయంగా తోటలో పూలు కోసి, అల్లి దేవుడికి అలంకరించి పూజ చేసేవారు. 
• ‘మీరాబాయి’ సినిమాలో నటించినప్పుడు ఒక భజన పాడుతూ పాడుతూ క్యారెక్టర్‌లో పూర్తిగా లీనమైపోయి నిజంగానే స్పృహ కోల్పోయారు ఎం.ఎస్‌. ఆ స్థాయి నటన తర్వాత భర్త సలహా మేరకు సినిమాల్లో నటించడం మానేశారు. ఎం.ఎస్‌.సుబ్బులక్ష్మి కేవలం సంగీతం కోసమే పుట్టారని ఆమె భర్త నమ్మారు. భక్తిని, సంగీతాన్ని విడదీయలేనంతగా మమేకమై పాడారు. 
• యూత్ డ్యూ, ఛానల్‌ 18 పర్ఫ్యూమ్స్‌ అంటే ఎం.ఎస్‌కు చాలా ఇష్టం. అలాగే ఎవరైనా తనకు బహుమతిగా ఇచ్చిన చీరలను వారింటికి వెళ్లినప్పుడో, వారు తన దగ్గరికి వచ్చినప్పుడో గుర్తుపెట్టుకుని మరీ కట్టుకుని వారిని సంతోషపరిచేవారు. 
• ప్రతి సంక్రాంతి పండుగకూ ఒక చిన్న సంచిలో పది రూపాయలు, పప్పు, బియ్యం, బెల్లం ఉంచి కుటుంబసభ్యులకు, పనివాళ్లకూ సమానంగా పంచేవారు.